Socsargen Hospital, Paimbestigahan!

Board Member Eugene Alzate

Paimbestigahan karon ang Socsargen Hospital human wala niini gidawat ang usa ka bata nga taga Calabanit, Glan, Sarangani Province.

Nasayran nga alas 7 sa kagabhion,gitabang ang batang  si alyas “Angel” human nadiskobrehan sa ginikanan niini nga nibahilig na sa duyan ang bata ug nakaihi na kini sa sapot ug wala na’y panimuot. Gilayon kining gidala sa Glan District Hospital apan wala’y igong pasilidad sa maong ospital hinungdan nga gidala kini sa Socsargen Hospital kung diin aduna’y Memorandum of Agreement ang nahisgutan tali sa probinsya sa Sarangani. Apan pag-abot sa maong ospital, wala gidawat ang bata tungod wala’y P20,000 nga pangdown-payment ang amahan niini nga mao’y gipangyo ospital. Dili lang duha apan katulo kahigayon gibalik balik ang bata sa Socsargen Hospital apan gibalibaran gayud kini sa nahisgutan. Tungod sa pakiluoy sa amahan sa bata nangayo ug P2,000 nga down-payment ang maong ospital. Alas 1 sa kabuntagon, giadmitar ang bata sa intensive care unit sa apan alas 4:15 sa kabuntagon nakabsan na kini sa iyang hinulamang kinabuhi.

Sa privilege speech ni Board Member Eugene Alzate, gibutyag niini nga nilapas sa ilang MOA ug sa Republic Act 7610 kon Special Protection of Children Against Abuse, Explotion and Discrimination Law ang Socsargen Hospital.

Sa kasamtangan, padayon pa ang gihimong pahimong imbestigasyon ni Governor Miguel Dominguez sa maong insidente. (Gretchen O.)