COMELEC gipanghimakak ang isyung pagtago sa Voter’s ID

GIPAKLARO karon ni Election Assistant 2 Client Vincent Dumaguit ang isyu may kabahin sa alegasyon nga gipangtaguan sa ilang buhatan ang ubang mga Voters Identification Card.  Sumala pa sa nahisgutan, dili tinood ang maong alegasyon tungod aduna matud pay gipakanaug nga Memorandom ang Nasyunal nga temporaryong ihunong ang pagrelease ug mga ID aron susihon ug magpahigayon ug clearing sa isyung double registrants sa matag rehiyon ingon man sa tibuok nasud.

            Sa pikas bahin, balik  na sa normal nga serbisyo ang  COMELEC kung asa niadtong nakalabay’ng adlaw  nga Sabado temporaryong gihunong tungod sa pag expire sa Voters Registration System(VRS).  Kini human namahayag ang buhatan ni General Santos City Comelec Officer Atty. Jose M. Villanueva, pinaagi ni Election Assitant 2 Ellaine Mae O. Ugdaniel nga andam ug pwede na usab silang modawat ug mga magpa rehistro sa ilang buhatan.

            Gibutyag usab niini nga tungod sa Centralized nga sistema, gikinahanglang hulaton una nila  ang kumpirmasyon sa ilang Computerized voters list(CVL)  Technician nga gikan sa probinsya sa South Cotabato hinungdan nganong nadelatar ang ilang serbisyo sa katawhan. Gihingusgan niini nga walay mabag-o sa proseso sa pagparehistro diin magdala gayud sila sa mga rekusitos sama sa duha ka mga valid ID, birth certificate ug marriage contract alang sa mga magpa usab sa ilang civil status. Gidugang pa niini nga 50 ka mga magpa rehistro lang ang ilang dawaton matag adlaw sulod sa 18 ka bulan nga panahon nga gigahin sa ilang buhatan aron dili sila makompromiso sa mga katawhan nga mag gahin ug panahon alang sa maong pagparehistro.

            Nanawagan usab kini sa tanang katawhan sa dakbayan nga mangayo sila ug despensa sa maong panghitabo diin supak usab kini sa ilang kabubut-on. Gipasabot niini ang katawhan nga dili ang ilang mga himan nga kompyuter ang dunay problema kun dili ang mismong sistema nga normal nang gigama nga dunay expiration date, Busa normal lang ang maong panghitabo ug walay angayang kabala-an. Sa pikas bahin, mukabat usa kalibo na ang nagparehistro sa COMELEC sa syudad sugod niadtong Mayo 3, 2011. Samtang  wala pa usab niini gitino kung kanus-a ang insaktong petsa alang pag resume sa pag release sa mga nahisgutang mga ID’s. (Cris Legaspi)