PCL-Prexy Alma Moreno, mitan-aw sa Gensan Gym!

General Santos City Gymnasium-Wala nagpaulahi ang Philippine Councilor’s League President nga si Alma Moreno nga mutan-aw sa Pacquiao-Mosley Fight sa General Santos Gymnasium kanhing Lagao Gym niadtong Mayo 8. Gikan sa Maasim Sarangani Province si Alma sa naasoyng adlaw tungod anaa kiniy panagpulong nga gitambungan kauban ang pipila ka mga councilor sa Gensan ug Sarangani. Matud pa ni Alma wala siya nagduha-duha nga mudiretso sa Gensan Gym human sa maong panagpulong tungod buot niining makauban ang mga Generals nga mutan-aw sa away sa inilang Pambansang Kamao. Sa pakighinabi sa ABANTE SOCSKSARGEN NEWS kang Alma, sa wala pa nagsugod ang away ni Pacquiao dako ang pagtuo niini nga subling masakmit sa kongresista ang iyang kalampusan. Gikakurat usab niini ang kadaghan sa mga taong mitan-aw sa maong gymnasium arun lamang ipakita ang ilang suporta sa susama nilang tubong gensan. “Excited and tinitingnan ko talaga yung reaksyon pati ingay nila.. ngayon pa lang nararamdaman mo na excited talaga sila na manalo si Pacquiao. Kung makikita lang ni Pacquiao to ma-iinspired siya talaga.” Nakasuot usab ug color yellow nga sinina si Alma isip hangyo ni Pacquiao nga mamahimong Yellow Sunday ang mismong adlaw sa away nila Mosley. Sa pagsugod sa away nilang Pacquiao ug Mosley ilabihan usab ang suporta ni Alma. Gidayeg niini ang kakusgon ug limpyong away nga gipakita sa Eight time world champion. Sa kadaugan ni Manny Pacquiao batok kang Mosley ilabihan ang kalipay ni Alma tungod matud pa niya dakong tabang ang nahimo ni Pacquiao sa nasud Pilipinas arun mapakita sa ubang nasud nga dili angayang biay-biayon ang mga Pinoy. (Kathy Kasayan)