POLICE ROUND-UP

Gidudahang gun-runner gipasakaan ug kaso!

            Napasakaan na ug kaso sa General Santos City Police Office ang suspetsadong nasikop nga si Gualberto Gonzaga, 55 anyos taga Phase 2, Block 20 lot 14, Doña Soledad Subdivision, Barangay Labangal sa gipahigayong Joint Operation sa General Santos City Police Office (GSCPO) ug Joint Task Force(JTF) Gensan ug DIPO. Kung asa nakuhaan ang suspetsado sa panimalay niini ug tag-as nga klase sa armas de fuego sama sa m-16 riffle,45 caliber,38 revolver, M-16 armalite rifle, mga buhing bala, nagkadaiyang plaka sa mga sakyanan ug mga gamit sa pag repair ug mga armas.

            Natigayon ang  raid pinasikad sa Search Warrant No. 11-25 nga giluwatan ni Hon. Judge Oscar Noel Jr. sa RTC branch 35. Mismong ang mga silingan ni Gonzaga wala nasayud nga adunay gina taguang matang ingon man ang mga kalihukan sa panimalay niini. Matud pa ni Col. Joselito Kakilala Commander sa JTF nga ila pang pagasusihon ang tanan may kalabutan sa gihimong raid tungod matud pa dako kini ug tabang aron malikayan ang mga dautang elemento sa pagmugna ug bisan unsa mang kagubot.

Kasong pagsupak sa “Illegal Possession of Firearms and Ammunitions ug IllegalPossession of Explosives (RA 8249 ug RA 9516) ang atubangon ni Gonzaga. (Joemar Plasabas/Dave Silagan) 

Pusher sikop sa PDEA-12 ug Norala PNP

            Norala So. Cot. – Sikop sa PDEA 12 ug Norala Municipal Police ang usa ka Ronald Tamon ,residente sa Brgy. Pob. Norala South Cotabato human nga naaktuhang namaligya ug Shabu niadtong milabay’ng Semana.

            Nasikop ang nahisgutan pinaagi sa usa ka impormasyon gikan sa “concerned citizen”, hinungdan naalarma ang PDEA 12 ug daling giplanuhan ang maong operasyon pinaagi usab sa nagpaka aron ingnon nga buyer sa panimalay sa suspek.

            Nakuha sa suspetsado ang usa ka sachet nga shabu nga iya nang nabaligya sa nagpakaaron-ingnong buyer ug laing napulo ka sachet sa shabu nga nakuha  sa iyang posisyon, ug ingon man ang marked money.

            Ang nahisgutang Suspek mag atubang sa kasong pagsupak sa Art II Sec. 5 ug 11 sa RA 9165. (Joemar Plasabas / Dave SIlangan)

Last - 2 financier, gihilambigit ang PNP ug Media?

            GSCPO - Gipanghimakak sa nakapyansa nga  gituohang “last two financier” nga si Edna Tuanzon, residente sa Llido Subd. Brgy. Lagao, GenSan nga matud pa dunay mga media ug kapulisan nga protektor sa ilegal nga sugal.Si Edna asawa sa kapitan sa Brgy. Nagpan, Malungon, Sarangani province nga si Emil Tuanzon.

            Nakuha sa sulod sa balay suspek ang mga last two paraphernalias, salapi ug 2 ka fax machine nga gituohang ginagamit sa maong operasyon. Byernes sa hapon sa milabay’ng semana, mukabat sa P200 mil ang napyansa niini bugti sa temporaryong kagawasan sa nahisgutang suspek. Gi raid sa kapulisan ang panimalay niini sa naasoy’ng dapit human nagpagawas ug Search Warrant si Hon. Judge Oscar Noel sa RTC Branch 35.Samtang niadtong Lunes gipasaka na sa IDMS ( Investigation Detection and Management Section) ang kasong pagsupak sa Sec. 3 sa RA 9287 kabahin sa Illegal Gambling.

            Kahinumduman nga sa milabay nga katuigan gihilambigit ang pipila ka mga tag-as nga opisyal sa kapulisan ug membro sa lokal media nga nagdawatan ug “payola” sa mga big-time financiers sa illegal numbers game. (Joemar Plasabas/Dave Silagan)