Banco Filipino Depositor, magpasa na sa ilang Deposit Claim - PDIC

Gi-awhag karon sa buhatan sa Philippine Deposit Insurance Corporation kun PDIC ang tanang mga depositor sa SOCSKSARGEN Area sa Banco Filipino-General Santos City Branch sa Santiago Boulevard nga magpasa na sa ilahang mga deposit claim ngadto sa maong Bangko. Kahinumduman nga niadto lang Abril 28, 2011 nagsugod na sa pagdawat ug mga Claims Receiving Operations kun CRO ang maong buhatan arun hatagan ug pagtagad ang mga depositor nga makuha ang ilang mga deposito sa Banco Filipino Savings and Mortgage Bank nga adunay insurance sa PDIC. Base sa gipadangat nga sulat sa Senior Vice President sa PDIC nga si Sandra Diaz, gisaysay niini nga hangtud lamang sa Marso 18, 2013 ang pagpasa ug claim sa mga depositor may kalabutan sa ilang gi-deposit nga kwarta sa Bangko. Gipaklaro usab sa PDIC nga human sa Marso 18, 2013 dili na nila asikasuhon pa ang ubang claims alang sa gustong mukuha sa ilang insurance ug kini base sa  gipagawas nga probisyon sa PDIC Charter RA 3591. Andam usab nga muatiman ang mga representante sa PDIC sa tanang mga depositor may kalabotan sa pagkuha sa ilang kwarta. Arun daling maasikaso mamahimong mu-sumite ug claim form nga gihatag sa PDIC, orihinal nga ebidensya susama sa passbook, Certificate of Time Deposit, ATM ug orihinal nga enlarged photocopy sa duha ka valid nga ID. Sa pagkakaron, mamahimong mupadangat sa Banco Filipino-GSC Santiago Boulevard Branch para sa tukmang schedule sa pagdawat sa mga rekisitos. (Kathy Kasayan)