CENSUS sa GenSan, gigisa!

GI-ULAN ug pangutana ang on-going project sa dakbayan sa  Heneral Santos nga Census atul sa gipahigayong Press Conference niadtong Mayo 3, 2011. Pipila ka mga magsisibya ang mitambong sa maong panagpulong lakip na ang ubang  mga opisyales sa dakbayan. Anaa usab si Engr. Nael Cruspero sa buhatan sa City Planning and Development Office kun CPDO ug Mayor Darlene Magnolia Antonino–Custodio arun tubagon ang mga pangutanang ibato may kabahin sa maong isyu. Una na niini gipaklaro ni Mayor Custodio nga dako ang tabang  nga mahimo sa census tungod ang datus nga makuha niini paga-gamiton isip base-line data alang sa mga planong pagahimuon sa lungsod. Ang 26 ka mga barangay sa Gensan paga tungaon ngadto sa lima ka cluster arun mas mapadali ang proyekto. Gibutyag usab niini nga ang gipahigayong lokal census adunay kalahian sa gihimong census sa buhatan sa National Statistics Office kun NSO tungod ang lokal matud pa mu-focus ngadto sa panglawas ug socio-economic status sa mga residente sa dakbayan samtang ang National mu-focus matud pa sa mga national policies. Gi-kwestyon usab ang minilyon nga budget nga gigahin sa maong proyekto kung diin kwarta mismo sa mga taxpayer ang gigamit. Sumala pa ni Mayor Custodio, kinahanglan nga gahinan ug budget ang census tungod dako ang matabang niini sa administrasyon. “ The budget for the census, I believe is one of the most important actually investment of this administration to be making in terms of planning for the future of actually any administration.” Saysay pa ni Custodio. Andam usab nga muhatag ug kopya sa resulta ang buhatan sa CPDO alang sa mga residente. (Kathy Kasayan)