Giawhag karon sa buhatan sa City Social Welfare and Development Office (CSWDO) ngadto sa mga opisyales ilabi na kang Mayor Darlene Antonino-Custodio sa pagpatuman sa Anti-Mendicancy Law sa dakbayan sa Heneral Santos. Kini human nireklamo ang pipila ka mga Generals sa padayong pagdaghan sa mga badjao nga nagapalimos sa gawas sa mga balay patigayun, tulunghaan ug sa kadalanan. Makadaghang gihayon na usab nga aduna’y nasikop ang Civil Security Unit kon CSU nga mga badjao nga nagapanglibang sa plaza. Ug bisan pa man gani ipanghatud ang mga nahisgutan sa ilang pinuy-anan sa Kulasi, Barangay Labangal ug Barangay Bawing magbalik-balik gihapon ang mga sa pagpanglimos kung diin nakahatag gayud kini ug labad sa ulo sa katawhan.
Makigpulong na ang CSWDO kang Mayor Antonino-Custodio aron masayran niini ang Presidential Decree No. 1563 kon Anti-Mendicancy Law usa ka balaudnon nga una ng gi-implementar sa panahon ni kanhing Pangulong Ferdinand Marcos apan wala na kini nahatagan ug pagtagad.
Ang mendicant kon nagapalimos mao kadtong mga tawo nga walay trabaho ug legal nga suporta apan adunay katakos nga mangita ug kwarta pinaagi sa pagpangayo. Kung si kinsa man ang masikop nga manglimos adunay multa nga P500.00 ug mabilanggo sulod sa duha katuig. Kung masikop kini sa ikaduhang higayong kon kadtong ginatawag nga habitual mendicant adunay multa nga P1,000.00 ug mabilanggo sulod sa upat katuig. Samtang kadtong nagapanghatag sa mga manglilimos adunay multa nga P20.00. (Gretchen Oliver)
No comments:
Post a Comment