POLICE ROUND UP

Makar Police Station 2 Gibakbak!

Gibakbak na sa pagkakaron ang Police Station 2 sa Makar Wharf, Gensan niadtong milabayng semana. Giguba kini pinaagi sa mando sa Lokal nga panggamhanan sa planong pagmuntar sa Traffic Light alang sa maong dalan. Mismong ang mga opisyal sa pagpanguna nilang PCI Samuel Cadungon ug PO3 Rex Diongon ang nangunay sa pag demolish aron mapadali ang maong proyekto. Kahinumduman nga una nang gitudlo nga ang Makar Police Station anaa sa Road Right of Way ug kinahanglan nga ibalhin sa tapad nga gambalay niini aron malapdan ang nahisgutang dalan. Matud pa ni Cadungon nga dako kaayo ug bintaha nga mabalhin sila aron mapadali ang serbisyo ngadto sa katawhan ug hilabi na sa pagresponde sa mga krimen. Hinuon ang ilang gibalhinan bag ong gama ug halapad itandi sa una.

(Joemar Plasabas/ Dave Silagan) 

Pagpamusil patay sa NBI asset gisuta

Wala pay nahimong pinal nga resulta sa imbestigasyon ang mga kapulisan ug mismong ang buhatan sa National Bureau of Investigation- Sarangani Division Office (NBI-SARDO) sa nahitabong pagpamusil patay sa usa ka drayber sa NBI diin naka angkon kini ug unom ka samad pinusilan. Sigon pa sa mga naka saksi sa maong nahitabo nga gitiwasan pa sa mga suspek ang biktima.Kahibaluan nga nahitabo ang pagpamusil banda alas 6:00 ang takna sa gabii niadtong huwebes petsa 12 bulan sa Mayo ning kasamtangang tuig.Nailhan ang biktima nga si Lito Parojinog, residente sa Block 2, Brgy. City Heights. Sa inisyal nga imbestigasyon sa Lagao PNP nasayran nga sakay ang biktima sa motorsiklo nga nagsubay sa National Highway sa Barangay Baluan apan kalit kining gipusil sa wala mailhing suspetsado sakay usab sa laing motorsiklo.Kalibre punto 45 ang gigamit sa krimen diin narekober sa crime scene ang unom ka mga basiyo niini.Gibutyag usab ni Atty. Ferdinand Balduman, Deputy District Officer nga  banda alas 3:00 sa hapon mibiya sa panimalay ang biktima subay usab sa pagbutyag sa asawa niini.Dili pa usab matino ang motibo sa maong pagpamusil.

 (Cris Legaspi)

Gensan Bomb Squad Giklaro ang isyung palpak sila sa kompetisyon

Giklaro karon ni PO2 Erwin Novida, Post Blast Investigator ug Bomb Technician GSCPO – Bomb Squad i kalabot sa nahitabong pakyas nga pagpabuto sa Improvise Explosive Device sa ilang tropa sa nahitabong 2^nd Bomb Counter measures Competition pipila ka semana na ang nakalabay. Gidepensahan sa mga maong  labaw ang iyang mga sakop nga matud walay nahitabong kakulangon sa ilang nahibaluan kung dili sa ubos nga kalidad sa mga himan nga ilang gigamit.Kahibaluan nga mipalpak sa pagpabuto sa ilang bomba ang Explosive Ordinance Division sa Gensan  sa nasangpit nga kompetisyon. Gidugang pa niini nga nagpadayon gihapon ang ilang gipahigayong Bomb Threat Seminar ngadto sa ilang buhatan alang usab sa mga bag-ong musolod sa ilang banay. Gipasalig usab sa maong labaw nga walay angayang kabalak-an ang tibuok dakbayan batok sa teroristang manghasi gumikan kay andam na matud pa ang ilang grupo.

(Cris Legaspi)