Barkong nasangyad mag-atubang ug Kaso

MV DOUBLE PROSPERITY (Photo by: Arniel Arsolon)

Daku ang posibilidad nga posibleng mag atubang ug kasong pagpanglapas sa RA 7586 kon National Integrated Protected Areas System (NIPAS) Act ang barkong MV Double Prosperity. Kini human misangyad ang maong langyawng barko sa kadagatan nga  bahin sa Tambilil, Kiamba partikularmente sa Takut reef, mga 2.5 nautical miles gikan sa baybay sa Kiamba niadtong Domingo alas 10 sa buntag, May 08, 2011 atul sa away ni Congressman Manny Pacquiao batok kang Sugar Shane Mosley. Ang maong barko ang dunay gidak-on  nga 39,727 gross tonnage, dunay gitas-on nga 227 meters ug dunay gilapdon nga 34 meters ug kini rehistrado sa Panama. Nasayran sa Abante news nga gikan sa Australia ang maong barko nga dunay kargang coal aron i-deliver sa nasud India. Apan pakyas nga kining nadeparahan sa mga crew sa maong barko hinungdan sa moang insedente. Giangkon usab sa Kapitan sa maong barko nga si Danilo Sta. Ana nga wala gayud sila naka bantay sa maong panghitabo nga miresulta sa pagka guba sa mga coral reef sa nahisgutang dapit.

Kahibaluan nga una nang miresponde sa maong panghitabo ang Philippine Coast Guard sa pagpanguna ni Acting Station Commander Chief Petty Officer Francis Erigbuagas aron sutaon ug masukod ang posibleng nahimong damyos sa maong panghitabo. Gikabalak-an usab niadtong tungura ang posibleng kaso sa oil spill. Human sa maong panghitabo daling miresponde sa  nahisgutang barko silang Protected Area Superintendent Dirie Macabaning, Sarangani Bay Protected Seascape (PASU), CENR Officer Wahid Amella ug Municipal Councilor Danny Martinez alang sa pagsusi sa kahimtang sa mga nahisgutang nadaut nga parte sa dagat sa Kiamba.

Sa kasamtangan padayon pa ang gihimong imbestigasyon sa mga hingtungdan aron masayran kung pila’y kantidad sa kinatibuk-ang nahimong kadaut sa maong barko ngadto sa mga corrals sa dagat. (Arneil A. /Cris L.)