Mag-asawang taga GenSan Positibo sa HIV

Gikumpirma  sa buhatan  sa City Health nga  dunay  mag-asawa  dinhi sa dakbayan  ang  positibo  sa HIV/AIDS.  Matud  pa  ni Dr. Mely Lastimoso, Social  Hygiene Coordinator  sa City Health Office nga  boluntaryong  nagpa check-up sa  ilang  buhatan  ang  mag-asawa  ug  human sa  mga  lab test  nga  gipahigayon  ingon  na  ang  mga  sintomas  nga  gibate sa  mag  asawa nakompirma    nga  sila  positibo sa  maong  balatian. Tungod  niini  nabalaka  na  karon  ang buhatan sa City  Health  tungod sa  padayong  pagsaka  sa  mga  ihap sa mga  nataptan sa  makalilisang  nga  balatian.Nasayran  nga mikabat  na  ngadto sa  baynti  otso ang positibo sa HIV / AIDS kung  diin  nadugang  sa  maong listahan  ang  mag-asawa  nga  bag-uhay  pa  lamang  nakompirma  sa maong buhatan. Sa  maong ihap  baynti  dos  ang  mga  lalaki  ug  unom  usab  ang  mga  babae.

Gibutyag  ni  Doctora  Lastimoso  nga  sukad niadtong  nakalabay  nga tuig  pito  na ang  nataptan sa  HIV  dinhi lamang sa  siyudad. Gipasalig usab sa maong opisyal  nga libre  ang  tambal sa mga  tawong  dunay  HIV. Samtang  basi  usab sa  talaan sa Department of  Health  nga  misaka  ngadto sa 172  ka  tawo ang  positibo sa HIV  sulod lamang sa bulan sa Marso kung  diin  muabot  na ngadto sa 483  ang  dunay  HIV  sa unang quarter  pa  lang ning  tuiga. Gituhuan  sa  mga  opisyal sa DOH  nga ang  aktibong sex life sa  nagkadaiyang  partner  ang  hinungdan nga  midaghan  ang  ihap sa  mga nataptan  ug  HIV kung  diin  sagad  niini  ana-a  sa  pangidaron  nga baynte hangtud  trintay  singko  anyos.

Sa  kinatibuk-an misaka nna  ngadto sa 6,498 ka  mga  Pilipino  ang  dunay HIV/ AIDS, kini  basi  usab sa  listahan sa National HIV and AIDS  Registry ug  ang  unang natala  nga  nataptan sa  maong sakit natigayon  niadtong 1994. (Venus C.)

.