NAGSUGOD na sa pag-ampo ang inahan ni Pound for Pound King Congressman Manny “Pacman” Pacquiao atul sa umaabot nga away niini ngadto kang Sugar Shane Mosley karong Mayo 7 sa MGM Grand Arena, Las Vegas, Nevada. Sumala pa kay Mommy D sakit para kaniya nga makita ang anak nga masakitan hinungdan nga pipila na ka away sa anak ang wala niya gitambungan sa personal. Ulahing nakit-an personal ni Mommy Dionesia si Manny sa away niini batok kang Antonio Margarito ug sukad niini halos dili na muusab ang Pac-Mom nga mutan-aw sa away sa anak. Gani karon pa lang nagsugod na sa pag ampo si Mommy D alang sa kalampusan sa anak. Giangkon niini nga siya mismo ang mitugon 8th division World Champion Manny Pacquiao nga kanunayng mag ampo ug dili kalimtan ang Ginoo dili lamang kung anaay away ang anak kung dili sa matag higayon arun magpasalamat sa mga grasyang naangkon. Kahinumduman nga una paman magsugod ang away ni Manny dayon kining mangurus isip pagpamatuod sa pagsalig sa Ginoo. Una nang gisultian ni Mommy D ang anak nga dili na kini muadto sa Amerika apan iampo na lang niini ang iyang kadaugan. Sa pikas bahin milarga na usab sa Estados Unidos niadtong milabayng semana ang misis sa Kongresista nga si Jinkee Pacquiao arun muhatag ug suporta ngadto sa asawa. Nagpasalamat si Jinkee tungod maayo ug nahimong kondisyon ang panglawas ni Pacman atul sa gipahigayon niining training. (Kathy Kasayan)
No comments:
Post a Comment