Bb. Pilipinas 2011 Miss Universe Shamcey Supsup, gidumog sa mga Generals!

GENERAL SANTOS CITY-NAGPUNSISOK ang  mga katawhan sa  kadalanan sa dakbayan  niadtong Abril 13 human gipahigayon ang Grand Welcome celebration ni Bb. Pilipinas 2011-Miss Universe Shamcey Gurrea Supsup nga gipasiugdahan  sa lokal nga panggamhanan. Alas 3:34 sa hapon sa mismong adlaw miabot sa General Santos City International Airport si Supsup kauban ang mga ginikanan niini nga silang Timoteo ug Engr.Marcelina Supsup. Gisugat sila ni Gensan Mayor Darlene Antonino-Custodio, Congressman Jun Acharon ug pipila ka mga opisyal sa dakbayan. Mukabat sa usa ka oras gipahigayon ang motorcade ni Supsup, napuno ang mga kadalanan bitbit ang mga tarpaulin sa beauty queen isip pagdayeg sa tubong gensan ug gisundan ug press conference sa City Mayor’s Office. Wala usab nakalikay ang Bb. Pilipinas 2011 sa mga pangutanang gibato kaniya sa mga media ug dali lamang niya kini natubag. Nangayo usab siya ug suporta sa mga taga Gensan nga suportahan siya sa umaabot nga Miss Universe Beauty Pageant karong Septembre 12, 2011 sa Sao Paolo, Brazil.  Human sa press conference nag-unang bisita si Shamcey sa 23^rd National Convention of the Prosecutor’s League of the Philippines sa KCC Mall of Gensan. Gipasalig niini nga andam niyang himuon ang tanan arun masakmit ang titulong Miss Universe 2011. Gikalipay usab ni Mayor Darlene Antonino-Custodio ang subling kadaugan nga nakuha sa mga generals. Nagpamatuod lamang kini nga ang Gensan dili lang Tuna Capital of the Philippines kung dili giila usab nga Home of the Champions. (Kathy Kasayan/ Ed Angeles)