GENERAL SANTOS CITY-Gipahugtan sa Department of Health (DOH) ug City Health Office (CHO) sa dakbayan sa Heneral Santos ang kampanya batok tipdas ug german measles kon rubella nga adunay slogan nga “iligtas sa tigdas ang pinas” kung diin nagapahigayon ug pagpamalay-balay nga pagbakuna alang ngadto sa mga bata nga nag-edad ug siyam ka bulan hangtud walo ka tuig.
Gisugdan na sa maong ahensya ang usa ka bulan nga door-to-door measles vaccination campaign niadtong Abril 4 hangtud Mayo 4 tuig kasamtangan. Motuyok ang tanang mga volunteers ug health workers sugod lunes hangtud sabado aron sigurohon nga mabakunahan gayod ang tanang mga bata sa bente sais (26) ka barangay sa dakbayan ug malikayan ang kamatayon tungod sa makatakod nga sakit.
Ang maong kampanya batok tipdas sumpay lamang sa gipahigayong mass immunization ning milabay’ng tuig 1998, 2004 ug 2007 kung diin tumong niini nga mamahimong “measles free” ang nasud Pilipinas sa taliabot nga tuig 2012. Sa gipagawas nga record sa DOH 12 nasayran nga sukad bulan sa Enero hangtud Abril tuig kasamtangan dese syete (17) na dunay tipdas. Makuha ang maong sakit pinaagi sa hangin. Giawhag usab ni Dr. Jacinto Makilang, labaw sa City Health Office ang tanang hingtundan nga magpahimulos sa libreng bakuna nga pwedeng makuha sa health center sa matag barangay. Gidasig usab niini ang mga katawhan nga makipaglambigit sa nasudnong Measles Rubella Supplemental Immunization Activity kon “MR. SIA” aron mapugngan ang posibleng pagkatag sa maong makatakod nga sakit. (Gretchen Oliver)
No comments:
Post a Comment