BJMP, nangayo ug tabang sa City Health!

Nanawagan karon ang Bureau of Jail Management and Penology kon BJMP ngadto sa City Health Office ug lokal nga panggamhanan nga tabangan ang ilang buhatan sa pagpahigayon ug regular check up, paghatag ug mga tambal aron malikayan ang hinanaling kamatayon sa mga binilanggo. Ang  maong panawagan subay  sa  mga  isyung migawas  nga  nagpasagad  matud pa sila kung diin mao’y gitudlong hinungdan sa pagkamatay  sa mga binilanggo. Nasayran  nga pito na ka  mga  piniriso   ang  namatay sulod lamang sa  napulo  ka adlaw  sa  walay  tinong  hinungdan. Samtang sagad sa  mga nangamatay ang adunay kasong RA 9165 kon paglapas sa paggamit sa ginadili nga droga nga nailhang sila Utto, Padal ug Mangellen. Namatay usab tungod sa highblood silang Barangan, Herodiaz ug Tamsey samtang si Doling namatay tungod sa atake sa sakit sa kasing kasing.

Sa kasamtangan, adunay dos mil kwarto syentos syetentay otso (2,478) ka piniriso ang ila karong gihuptan kung diin tag singkwenta pesos (P50.00) matag piniriso ang  budget sa  pagkaon  matag  adlaw. Gisaysay ni Regional Director Jail Senior Superintendent Pio Capistrano nga sa Region 12 adunay budget sa tambal nga P128,000 kon tres pesos (P3.00) matag piniriso. Giangkon ni Senior Superintendent Capistrano nga naglisod gayud sila sa pagbudget sa maong kwarta aron lang ipaigo sa mga piniriso. (Gretchen Oliver)