BAYAN-SOCSKSARGEN nagpiket sa pag-abot ni PNOY, pagdakop sa 2 ka raliyista, gikondena!

General Santos City- Gikondena sa BAYAN ang pagdakop sa (GSCPO)General Santos City Police Office nila ni Susan Acido Chairperson sa Gabriela-Gensan ug Allan Kempis PIO sa Gabriela-Gensan tungod lamang sa naay unod nga placards ug flags ang ilang bag panahon nga nisulod kini sa nahisgutang mall aron moadto sa Comfort Room. Human sa pagdakop kanila gi-turnover kini ngadto sa CIDG sa Camp Fermin Lira bandang alas dyes y media (10:30AM) sa buntag.

Human sa mubong demonstrasyon atbang sa KCC mall nidiretso ug nagpiket usab ang BAYAN atbang sa CIDG bandang alas onse sa buntag. Nanawagan ang grupo sa hinanaling pagbuhi kang Acido og Kempis kay wala man kini kaso. Bandang alas kwatro y media sa hapon gibuhi-an ang duha ka raliyistang gidakop.

“Ang pagdakop kang Acido ug Kempis nagpakita lamang sa kabangis sa gobyernong Aquino. Usa kini ka porma sa padayong pagamig-ot ug pagpamitol sa katawhang nakigbisog”

Kahinumduman nga kapin kwarenta(40)ka mga raliyista gikan sa militanteng grupo nga Bagong Alyansang Makabayan kun BAYAN - SOCSKSARGEN ang nagpahigayon og mubo nga demonstrasyon atol sa pag-abot ni Presidente Noynoy Aquino dinhi sa dakbayan  atubangan sa KCC Mall of Gensan.

Gipaabot sa BAYAN ang ilahang dakong pagkadismaya kang P-Noy diha sa dili pagsubay sa “daang matuwid” nga iyang gisaad.

Sumala kang Ryan Lariba, Regional Spokesperson sa BAYAN - SOCSKSARGEN, wala pa man natuigan si Noynoy isip Presidente, gipakita na niini nga wala siyay kalahian kang Gloria Arroyo.

“Padayon gihapon nga gapatuman sa mga dili haum nga solusyon sa mga katilingbanong problema, susama na lamang sa pagpatuman sa Conditional Cash Transfer ug Fuel subsidy isip sulbad kuno sa kapobrehon sa katawhan ug kamahal sa presyo sa lana. Susama ni Gloria Arroyo, si Noynoy dili andam mopasiugda sa mga tinuoray nga kausaban nga mao man untay iyang gisaad kanato,” matud pa ni Lariba.(Bonie Santillan)